সিলেটি ছ ড়া । । । । খারাম খালি বাঁশ! |||| বিশ্বজিৎ মানিক
————————
আদা পিয়াইজ – চিনির দামে
মাথাত পরছে আত
কেমনে যাইতো – দিনখান-রে ভাই
কাটতো কেমনে রাইত!
একশো পঁচিশ – চিনির কেজি
পিয়াইজ বুলে আশি
আদা কিনাত – গিয়া দেখি
গলাত পড়বো ফাঁসি।
কোন জিনিষটা – কম দামে পাই
হস্তা কোনটা কও?
দোকানদারে – ডাক দিয়া কইন
লও বা দাদা লও।
কয় টেকা পাই – বেতন আমি
খরছ কতোর লাগে?
চিন্তা কোনদিন – করছিলাম বা
ইতার কথা আগে?
টোকা দিয়া – ঘরর গিরতাইন
তাইন তো – পুরা খালাস
বাজার থাকি – বাড়িত গেলেই
বেগ খুলিয়া তালাশ!
আকতা আকতা – রাগর চোটে
ককখান কথা কই
চিল্লাচিল্লি – অইলে আবার
চুনরে কইবা দই!
ইলিশ খাইবার – লাগি জানে
উফর ফাফর করে
চউক মুঝিয়া – আইয়ই আমি
দাম হুনিয়া ডরে।
আগর দিনো – কাটি কাটি
বেছতা মাছর গাদা
কাটার কথা – কইলে অখন
আতো লইবা গদা!
কুটিপতি – যেরা আছইন
তাড়াই আছইন সুখী
গরীব মাইনসর – জান বাঁচানিত
হকল সময় ঝুকি।
অ-খান অইলে – হ-খান অয় না
অভাব হারাদিন
আর কতোবার – করতাম আমি
সুদি করি ঋণ?
মাজন সাবোর – দেনার দায়ে
পরমু কোনদিন ফান্দো
চউক থইয়াও – পথ দেখি না
অইছি যেমন অন্ধ!
হাছা কথা – কইতে কিতা
গরীব মাইনসর জান
সুযোগটা যেইন – পাইননা কেনে
তাইনওউ দিবা টান!
ভোটর সময় – আইলে হুনি
থাকতো নায় আর দুখ
কতো রাজা – আইলা গেলা
কোয়াই পাইলাম সুখ?
আমরা যেরা – নিত আনি খাই
কপাল পুড়ার জাত
লাগতো নায় বা – কোনতা আমরার
পাইলে খুশী ভাত।
উতরো বাড়ির – চাচায় কইলা
লুটরা বুলে টেকা
দাম বাড়াইয়া – লুকাই চুকাই
দেরাই খালি ধোকা।
গাড়ি বাড়ি – কিনরা কেউ কেউ
কেউ যারাগি বিদেশ
আমরার লাগি – থইয়া যারা
বিরান করি দেশ!
হিং খুদিয়া – কররা না কেউ
আগর লাখান চুরি
টেকা গুইনতা – নিবার লাগি
পাতাই রাখছইন বড়ি!
কোয়াই গেলে – শান্তি পাইমু
কেটায় দেরা আশ
যেবায় যারাম – হবায়দি ওউ
খারাম খালি বাঁশ!
২৩.০৫.২০২৩ খ্রিষ্টাব্দ।
